WIZARA YA MAJI YACHUKUA HATUA ZA DHARURA HANANG

Waziri wa Maji Juma Aweso akikagua mitambo ya kuchimba kisima cha maji

 Waziri wa Maji Jumaa Aweso amewahakikishia wananchi upatikanaji wa huduma ya maji katika maeneo ya vijiji na kata zilizoathiriwa na maporomoko ya matope kutoka Mlima Hanang’ yaliyosababisha miundombinu ya maji kuharibiwa na kusababisha madhara ikiwemo vifo, majeruhi na uharibifu wa mali.

Waziri Aweso ameeleza hayo wakati akizunguka katika maeneo hayo na kujionea hali ya upatikanaji huduma ya maji na jitihada ya kurejesha miundombinu ya Maji katika mji wa Katesh na maeneo mengine.

Amesema Wizara ya Maji imechukua hatua ya dharura kwa kuweka matenki ya maji 30, yaliyosambazwa katika makambi, vituo vya huduma za afya na maeneo ya vijiji vyote yaliyoathirika hasa Kata za Gendabi, Jorodom, Ganana, Katesh, Mogitu na Dumbeta.

Aidha, Waziri Aweso amekabidhi matenki ya maji 30 kwa madiwani na kuhakikisha yanaletwa mabomba ya maji matano yanayopeleka maji katika matenki na kuwafikishia wananchi huduma ya majisafi na salama muda wote.

Waziri Aweso amekagua na kujionea mitambo ya kuchimba kisima cha maji ambayo tayari imeanza kazi ambapo itasaidia kuongeza maji katika vyanzo ambavyo havijaaribiwa na maafa hayo.