SHULE YA WENYE UHITAJI KUJENGWA USHETU

Wadau wa maendeleo katika Halmashauri ya Ushetu mkoani Shinyanga, wameombwa kuunganisha nguvu ili kupata shule ya Watoto wenye mahitaji maalumu ili kusaidia kundi hilo kutimiza ndoto zao.

Ombi hilo limetolewa na mbunge wa jimbo la Ushetu Emanuel Cherehan, aliyekuwa mgeni rasmi katika kongamano la kupinga ukatili, lililofanyika katika Halmashauri hiyo, na kuwakutanisha wadau mbalimbali wa kupinga ukatili.

"Lakini pia kitu ambacho natamani tukipate ni shule ya wenye uhitaji, uwezo huo tunao, tuna wadau wa kutosha, mimi mwenyewe ni mdau, wanunuzi wa tumbaku ni wadau, madiwani ni wadau, kwa nini tusiwe na eneo tulitenge tupate shule yao?" Alieleza Mbunge Cherehan na kuongeza kuwa

"Kwa upande wa halmashauri ya Ushetu hii ni changamoto kubwa, watu wenye ualbino wanatamani kusoma lakini waende wapi, vipofu wanahitaji kusoma waende wapi, na napenda hii shule ijengwe katika makao makuu ya Halmashauri_Nyamilangano" Alisisitiza

Katika hatua nyingine Mhe. Cherehan amesema wanafunzi wa kike katika halmashauri hiyo wanakabiliw na changamoto ya maeneo salama ya kujistiri wanapokuwa katika siku zao za hedhi, huku akisisitiza kuwa nao ni ukatili kwao.

"sio walemavu tu Mkurugenzi, kuna wanafunzi wetu wananyanyasika sana wanapokuwa katika siku zao, hawana hata eneo la kujistiri, na hata kama lipo halipo katika hali ya wao kujiachia" Alisisitiza Cherehan

Awali akizungumza katika Kongamano hilo Mkurugenzi wa Halmashauri ya Ushetu Khadija Kabojela alilitaka Jeshi la Polisi kitengo cha Dawati la Jinsia kuendelea kutoa elimu kwa wananchi juu ya madhara ya vitendo vya ukatili huku akiwataka kusimamia kesi za ukatili kwa wakati ili wananchi waendelee kujenga imani juu ya utendaji wa Jeshi hilo.

"Polisi imekuwa ni mahali ambapo sisi tukiona vitu vyetu vimetushinda tunavipeleka tukiamini vitashughulikiwa ipasavyo, ili wananchi wawena imani na polisi ili waweze kutoa taarifa za ukatili, na kutoa madukuduku yao, lakini yasipofanyiwa kazi wananchi wanaona hta tukitoa taarifa wahalifu wataachiliwa tu" Alisema Kabojela

Kwa upande wao baadhi ya wananchi akiwemo Charles Kafuku amempongeza Mbunge Cherehani kwa wazo lake la kuanzishwa kwa shule ya Watoto wenye mahitaji maalum huku Loyce akiishukuru Halmashauri hiyo kwa kuwapatia elimu juu ya masuala yanayohusu ukatili hali iliyowasaidia kuwajenga kifikra ikiwa ni pamoja na kujua namna na maeneo ya kuripoti matukio hayo pindi yanapotokea.

Kongamano hilo ni sehemu ya Maadhimisho ya siku 16 za kupinga vitendo vya ukatili wa kijinsia nchini.