Na Steve Kanyefu, Kahama
Kamanda wa Polisi Mkoa wa Shinyanga, Janeth Magomi, amezindua
Kituo cha Polisi Kata ya Isaka katika Halmashauri ya Msalala,
huku akiwataka wananchi kushirikiana na Jeshi la Polisi kwa kutoa taarifa za
uhalifu na wahalifu ili kuimarisha ulinzi na usalama katika eneo hilo.
Akizungumza wakati wa uzinduzi wa kituo hicho, leo octoba 2,2026, Kamanda Magomi
amesema uwepo wa kituo hicho, kilichojengwa kwa ushirikiano wa wananchi, wadau
mbalimbali na Serikali, utasaidia kuimarisha hali ya usalama kwa wakazi wa
Isaka na maeneo jirani.
“Niwaombe wananchi, kukamilika kwa kituo hiki uwe ni mwanzo
wa ushirikiano mkubwa wa kuimarisha hali ya usalama kwa kushirikiana na Jeshi
la Polisi kwa kutoa taarifa za uhalifu na wahalifu.”
Kamanda Magomi pia amewataka askari watakaopangiwa kufanya
kazi katika kituo hicho kutekeleza majukumu yao kwa weledi na kuhakikisha
wananchi wanaofika kupata huduma wanatendewa haki.
“Tumejifunza upolisi, tunatakiwa tutende haki kwa wananchi
wanaokuja kupokea huduma kwetu,”
Katika uzinduzi huo, ACP Dkt. Method Mtana, aliyemwakilisha
Mkuu wa Jeshi la Polisi nchini Tanzania, IGP Camilius Wambura, aliwapongeza
wananchi kwa kushiriki katika ujenzi wa kituo hicho na kuwataka kuendelea
kushirikiana na Jeshi la Polisi pamoja na sungusungu katika kulinda kituo na
miundombinu yake.
“Mkuu wa Jeshi letu anawashukuru sana wananchi kwa kuanzisha
ujenzi wa kituo hiki. Niwaase wananchi kwa kushirikiana na sungusungu mvilinde
vituo hivi kwa hali na mali.”
Mbunge wa Jimbo la Msalala, Mabula Magangila, amesema
kuimarika kwa ulinzi na usalama kutasaidia kuchochea ukuaji wa uchumi katika
eneo hilo, hasa kutokana na ongezeko linalotarajiwa la magari makubwa
yanayofika katika eneo hilo.
“Miaka mitatu ijayo, maroli yatakayoingia hapa tunatarajia
sio chini ya 600 kwa siku. Kwa maana hiyo hatutaki kuwepo na viashiria vya wizi
katika eneo hili, ulinzi na usalama umeimarishwa.”
Kwa mujibu wa Mkuu wa Polisi wa Wilaya ya Kipolisi Msalala
(OCD), Yahya Shabani, ujenzi wa kituo hicho umegharimu jumla ya Shilingi
milioni 236, fedha zilizopatikana kupitia ushirikiano wa wananchi, wadau
mbalimbali na Serikali.
Amebainisha kuwa Wananchi na wadau walichangia zaidi ya
Shilingi milioni 26 katika awamu ya kwanza, huku awamu ya pili ikipokea
Shilingi milioni 100 na awamu ya tatu Shilingi milioni 110 zilizotumika
kukamilisha ujenzi wa kituo hicho.
Kukamilika na kuzinduliwa kwa kituo hicho kunatarajiwa
kuongeza upatikanaji wa huduma za Polisi kwa wananchi wa Kata ya Isaka na
maeneo ya jirani, pamoja na kuimarisha ulinzi na usalama katika eneo hilo
ambalo linaendelea kukua kwa kasi kiuchumi.
0 Comments