KADONYA AWAPA TABASAMU ZAIDI YA WAHITAJI 260 KATIKA KATA YA NYANDEKWA - KAHAMA

 

Mwenyekiti wa usalama barabarani mkoa wa Simiyu Amos Kadonya akikabidhi moja ya zawadi za sikukuu kwa wenye uhitaji Nyandekwa - Kahama, ikiwa ni sehemu ya kurejesha shukrani katika eneo alipozaliwa.

Mwenyekiti wa usalama barabarani mkoa wa Simiyu Amos Kadonya akikabidhi zawadi za sikukuu kwa mmoja wa wenye uhitaji.

KAHAMA. 

Mwenyekiti wa usalama barabarani mkoa wa Simiyu ambaye pia ni mjumbe wa mkutano mkuu wa CCM manispaa ya Kahama Amos Kadonya, amewakarimu wananchi zaidi ya 260 wenye uhitaji wakiwemo wazee, katika kata ya Nyandekwa manispaa ya Kahama mkoani Shinyanga, kwa lengo la kuwawezesha kusherehekea vyema sikukuu za mwisho wa mwaka.

 

Kadonya ametoa zawadi hizo Disemba 30/2024 ikiwa pia ni sehemu ya shukrani kwa wananchi hao wa kata ya Nyandekwa alipozaliwa na kusoma masomo yake ya awali, ambapo amegawa sukari, mchele pamoja na unga wa ngano.

 

Katika hafla hiyo iliyofanyika katika Kijiji cha Nyandekwa kata ya Nyandekwa, manispaa ya Kahama mkoani Shinyanga, wananchi wa Kijiji hicho wameeleza kukatishwa tamaa ya kuendelea kuchangia miradi ya maendeleo katika eneo lao, kwa madai ya Halmashauri kushindwa kamalizia kwa wakati majengo waliyoyaanzisha kwa nguvu zao.

 

Clemensia Mbago ni mkazi wa Nyandekwa Kahama amesema kukosekana kwa kituo cha afya katika kata yao kunaathiri juhudi za serikali katika kuhamasisha na kuhakikisha huduma bora ya baba, mama na mtoto, ikiwemo akina mama kujifungulia katika vituo vya kutolea huduma za afya ili kupunguza vifo vitokanavyo na uzazi.

 

“Yaani sasa hivi tuna miaka mitano tumeshamaliza kujenga, lakini serikali hakuna kinachoendelea, tatizo tunalolipata ni akina mama wakati wa kujifungua maana kuipata huduma hii ni km 3 hadi 4, hivyo inapelekea kuumiza mtoto au wote kufariki kabisa” Alisema Clemensia

 

Mkazi mwingine wa Nyandekwa Magreth Makoye, yeye akaeleza kuwa linapotokea suala la msiba wanapata adha kubwa ya kusafirisha mwili wa mpendwa wao kutokana na umbali wa hospitali na hivyo gharama kuwa kubwa.

 

“Kwa bahati mbaya mtu amefariki, kumtoa Kahama inatuwia ugumu namna ya kuusafirisha mwili wa marehemu gharama kubwa, lakini kama tukipata kituo cha afya hapahapa inatuwia ni rahisi” Alisema Magreth

 

Mwenyekiti wa Kijiji cha Nyandekwa Shadrack Bundala akieleza hatua zilizochukuliwa ili kukamilisha ujenzi huo amesema kila alipojaribu kuhoji alijibiwa kuwa jengo hilo tayari limeombewa fedha lakini bado hakuna kinachoendelea, huku akikiri wananchi wake kupata adha kubwa kufuata huduma za afya katika vijiji maeneo ya Jirani ikiwemo hospitali ya manispaa ya Kahama ambayo nayo ipo mbali na Kijiji chao.

 

Bundala amesema kutokana na hali hiyo wao kama viongozi wanakosa ujasiri wa kuendelea kuchangia miradi mipya ya maendeleo jambo ambalo linaathiri utekelezaji wa shughuli zao kwenye vijiji husika.

 

“Lakini sijajua sijui ni siasa mbovu, kila ukiuliza mara unaambiwa limekuwa la rufaa wakati bado ni boma tu, mara limeombwa fedha, kwa kweli mpaka tunavyosema hivi sisi kama wananchi wa Kijiji cha Nyandekwa ambao ndio tuna msiba mkubwa,  bado hatujajua hatima ya hilo jengo itakuwa ni nini” Alisema Bundala

 

“Kwa sababu mpaka tunavyokaa hivi wananchi hawa wanaendelea kuteseka kama walivyosema, huduma wanapata mbali, kutoka hapa mpaka waende mjini au waende Lowa na wakifika kule matibabu ni makubwa, mimi niiombe serikali itusikilize kero hii iweze kutuingizia fedha kwa wakati ili sasa wananchi hawa waweze kupata huduma zinazostahili” Aliongeza Bundala

 

Kadonya ambaye pia ni mjumbe wa mkutano mkuu wa CCM manispaa ya Kahama, amewasihi wananchi wa Nyandekwa kushikamana na na kushirikiana na viongozi wao waliowekwa kikatiba ili kutatua changamoto zinazowakabili.

 

“Lakini uongozi ambao upo madarakani ambao umechaguliwa kikatiba tuupe ushirikiano, la kwanza tuwe na upendo, palipo na upendo kuna amani, palipo na upendo kuna Mungu, palipo na upendo kuna mafanikio” Alisema Kadonya

 

Flora Sangiwa ni kaimu mkurugenzi wa manispaa ya Kahama, ametoa wito kwa wawakilishi wa serikali ngazi za chini kuhakikisha wanawaelimisha wananchi kuhusu mfumo mpya ulioboreshwa unaowataka wananchi wanapoanzisha mradi kuukamilisha.

 

Sangiwa amesema pamoja na hayo, tayari mradi wa kituo cha Afya Nyandekwa kipo kwenye utaratibu wa kukamilishwa na katika mwaka ujao wa fedha halmashauri italimalizia ili wananchi waanze kupatiwa huduma.

 

“Ni wajibu wa wananchi na kupitia wawakilishi wetu pia kuwaeleza kuwa wanapoanzisha hii miradi kupitia huu mfumo mpya ulioboreshwa walitakiwa wao wenyewe wawe wamekamilisha” Alisema Sangiwa

 

“Lakini pamoja na hayo, tayari boma hili lipo kwenye utaratibu wa kukamilishwa, na kwa mwaka ujao wa fedha tunaweza tukalikamilisha boma hili, kwa sababu limekuwa ni out-cry ya wananchi wa Nyandekwa.” Aliongeza

 

Mchakato wa awali wa ujenzi wa kituo cha afya Nyadekwa ulianza rasmi mwaka 2015 kwa nguvu za wananchi, ambapo mwaka 2020 hatua ya msingi ilikamilika na wananchi kuendelea kujitolea kwa kujenga boma ambalo lilikamilika miaka mitano iliyopita.

 

Wahitaji wakipokea zawadi zao.

Baadhi ya wakazi wa Nyandekwa wakisubiria kukabidhiwa zawadi zao.

Picha ya pamoja kati ya mwenyekiti wa usalama barabarani mkoa wa Simiyu na baadhi ya wakazi wa kata ya Nyandekwa waliofika kupokea zawadi za sikukuu.

MWISHO.