Diwani wa Kahama Mjini Godson Andrew akizungumza na maafisa usafirishaji (bodaboda), Manispaa ya Kahama, akihamasisha usafi wa mazingira na utunzaji wa mitaro ya maji kuepuka magonjwa na athari zinazoweza kusababishwa na mvua za El Nino.
🌟KAHAMA.
Diwani wa Kata ya Kahama Mjini,
Goldson Andrew, amewataka wananchi, wafanyabiashara na wajasiriamali kuimarisha
usafi wa mazingira, ikiwemo kusafisha mitaro na kuondoa taka ngumu, ili
kukabiliana na athari zinazoweza kujitokeza kutokana na mvua kubwa
zinazotarajiwa kuelekea mwisho wa mwaka.
Ametoa wito huo alipotembelea na
kuhamasisha usafi wa mazingira katika soko kuu la wakulima la Namanga Manispaa
ya Kahama.
Amesema taarifa za wataalamu
zinaonesha uwezekano wa mvua kuwa juu ya wastani, hivyo wananchi wanapaswa
kuchukua hatua mapema kuhakikisha maeneo wanayoishi, wanayofanyia biashara, mitaro
na mifereji ya maji inakuwa safi na wazi.
Amesema usafi ni muhimu husuani katika
maeneo ya masoko na vituo vya mabasi ambavyo vina mitaro inayohitaji kutunzwa
mara kwa mara ili kuzuia taka kuingia na kuziba njia za maji, jambo linaloweza
kuongeza hatari ya maji kutuama au kusababisha mafuriko wakati wa mvua hizo.
“Ni lazima mitaro yetu yote ifunguke
na pia tuhakikishe mitaro hii inakuwa misafi. Jiografia ya masoko yetu na
stendi ina mitaro, hivyo ni muhimu kuhakikisha taka hazizuii upitishaji wa
maji,” amesema Endru.
Amesema licha ya kuwa kata hiyo imeweka
utaratibu wa kufanya usafi kila Jumamosi kuanzia saa 12 asubuhi hadi saa tatu
asubuhi, bado wananchi wanalo jukumu la kuhakikisha maeneo yao yanakuwa safi
wakati wote.
Andrew amesema moja ya changamoto
inayohitaji kushughulikiwa ni baadhi ya wafanyabiashara wa maduka na fremu
kuchelewa kufungua biashara siku za Jumamosi ya usafi bila kufanya usafi, hali
inayowafanya kukosa muda wa kushiriki katika zoezi hilo.
Amesema wafanyabiashara wanapaswa
kuwahi asubuhi, kufungua biashara zao baada ya kufanya usafi wa maeneo yao,
ikiwemo mitaro, sehemu za mbele ya maduka na maeneo ya kazi, badala ya
kutegemea wafanyakazi wa usafi wa Manispaa.
Diwani Andrew amewapongeza wananchi wa
Kata hiyo, hususan wafanyabiashara wa Soko la Namanga na Stendi Kuu, kwa kuunga
mkono jitihada za Rais Dkt Samia Suluhu Hassan za kuhakikisha mazingira
yanakuwa safi wakati wote.
Amesema uongozi wa kata pia unashirikiana
na mzabuni wa ukusanyaji taka ili kuongeza mzunguko wa zoezi la kuzoa taka
ngumu kutoka mara moja kwa wiki hadi kila baada ya siku mbili au tatu, kwa
lengo la kuzuia mrundikano wa taka unaoweza kusababisha mitaro kuziba.
Kwa upande wake, Mwenyekiti wa Soko la
Namanga, Yahaya Juma, amesema usafi
sokoni hapo unaridhisha kutokana na ushirikiano wa viongozi wa Serikali na
wafanyabiashara.
Juma amesema ushiriki wa viongozi na
wananchi umewezesha usafi kuimarika, huku akieleza kuwa juhudi za kuhakikisha
soko linaendelea kuwa safi zinapaswa kuendelea hata baada ya siku maalumu ya
usafi.
Naye mfanyabiashara katika Soko la
Namanga, Christina Mpelwa,
amesema usafi katika eneo hilo umeanza kuleta mabadiliko, ikiwemo kuboresha
mazingira na hali ya hewa kwa wafanyabiashara na wananchi wanaofika sokoni.
Amesema “Usafi kwetu ulikuwa kero, lakini
kwa sasa tunaendelea vizuri. Nimeingia hapa nimeona mambo ni mazuri, hata hewa
nimeona ni nzuri kuvuta.”
0 Comments